Faíte, avóje lu cajúnne i parle faitàre

disponibile anche in: Italiano

Lu tràje de frebbàre 2019 a Faíte é sta la Féte du Cajúnne. Ujànne, cumme les ate vàje ó sunte sta le bancarèlle é purtà lò frustíje pe lu rúue de Faíte che i-ante viàue avóje cumme se piànte la lavànde, piànta pruvenzàle é cumme se macenàve la farínne u Mulínne Pirozzoli. Tuttuàje lu mattínne, cumme ciàche anne, é sta scurcjà lu cajúnne, é dappóje mengjà ‘nghiòcche u Punte, lò frustíje i-ante putí assaggíje suffrí é panúnte é ate paste (cúteche é fasúle, panquàje) pe fa quanàjere le recciàjese de Faíte. Lu cunte mé béje de ujànne é sta la “Pare de Vadeccóle”, para viéglje de Carnuàle che se fate lu derríje giuóre de Carnuàle, preparà de lu Spurtiélle Cumunàle.

La pare i-accúnte de un viàje ‘nammuórre ricce che premmíje de muríje se ulíve ‘nzurà dò ‘na bèlla fíglje che i cape un béje gióne avóje se puriélle. I cúnghje dò lu binne che i vénche ‘nghiòcche lu ma decchírre l’àngele i cacce lu demmuàjene. Le pare ó sunte sta: Desperà (viàje ricce), la Zite, lu Zite, Patanacòtte, Pulecenèlle, Nuttàre é Tummasíne, Viéglje, Àngele, Demmuàjene é fiàue, díje uàrdje, Prèute é tràje Sunattàue. Dappóje, la zite é tutte quànte appréje, avóje lòs enfànne vestí de Carnuàle, i-ante gerjà pe le vi de Faíte: lò frustíje se sunte viàje de binne e i-ante féje ‘nammuórre de letràtte. La “Pare de Vadeccóle” gli-é sta féje sule da muénne faitàre pettócche la tradeziúnne i uótte accussí.